أه من الحب ومن أساميه

آه م الحب ومن أساميـه



احترت وحارت دنيايَ فيه






اسمه "الهوى" لوعة وجوى



وقعة تخلّي الكعب التوى






أما "الغرام" غرامة وديون



تدفع وبرضه تموت مديون






وآدي "الوله" إلحق يا لَه



تبقى جوازة وقندلَـه






قالوا "الولع" نار الدلع



حريقة قايدة في قلب الجدع






و"الوجد" حُرقة أكيد موجود



يفني الشباب، ويمص العـود






أما "الهيـام" غيبـة تمام



وعقل سـارح على الدوام






أما "الشغف" يجيب القشف



والدنيا كمان معاه تتنسف






و"العشق" مؤلم للحبايب



القلب منه تايه ودايب






و"الصبوة" ميل عن الطريق



الحب فيها ولعـة وحريق






أما "الصبابة" حب الغلابة



عاشق ما يدرى غير الربابة






و"الكَلف" كلفة تقيلة ملهلبة



ووقعة سودة يا حبيبي مهببة






أما "الجوى" للي انكوى



حزن وما ليه طب ودوا






وقلنا "الوصَب" مرض العَصَب



تلقى المحب عيشته ف نَصَب






وفي "الشوق" قلب الحبيب بيسافر



وبحر عميق، والله ما لوش آخر.









و"الاستكانة" أصل الإهانة



خاضع ذليل مسلوب جنانه






يعني ما في أصل ودليـل



إن الهوى ده شيء جميل



خليك يا سيدي مع الخليل



الله في مُلكه ما له مثيـل.